Jordan Wolfson, Naglatag ng Bulwagan ng mga Salamin sa Gagosian New York

Nagbalik sa New York si Jordan Wolfson—ang artistang kilala sa pagsalungat at pagbaluktot sa gamit ng teknolohiya—sa inaabangang solong eksibisyon niya sa Gagosian gallery sa Chelsea.

Nakahanay sa espasyo ang mga matutulis na estrukturang bakal, na bawat isa’y may UV print ng mga paksa—may hiniram mula sa ibang imahe at may nilikha nang digital. Hinihikayat ng mala-salaming kintab ng mga eskultura ang manonood na mas lumapit sa bawat larawan, kasabay ng pagpapaluwag nito sa espasyo; samantala, ang mga tulis sa mga kanto ay umaalingawngaw sa mga obrang hango sa horror film ng artista.

Bagaman ipinahiwatig ng artista sa Artnet, noong nakaraang buwan na ito’y “isang napakatradisyonal na eksibisyon ng eskultura,” hindi maikakailang nakakabagabag ang mga imahe. Magkatabi ang dalawang bulaklak ni Robert Mapplethorpe at mga litrato ng Freedom at Twin Towers, habang seryosong nakatanaw ang isang Michael Jackson na may balabal. Kasama rin sa hanay ang isang bata at maskuladong CGI na Bob Dylan. Nariyan din ang “Made In Heaven,” marahil ang pinakapinag-uusapang piyesa sa eksibisyon sa ngayon: isang bersiyong nilikha ng AI mula sa serye ni Jeff Koons noong 1989, na mistulang direktang hinango sa isang pelikula ng Pixar.

“Para sa akin, ang likás na dahilan kung bakit ko nagustuhan ang mga imahe sa eksibisyon ay dahil pakiramdam ko’y may itinatago ang bawat isa, at may tensiyon doon,” ani Wolfson kay Ottessa Moshfegh sa pinakabagong isyu ng Gagosian Quarterly.

Mula sa VR installation niyang Real Violence noong 2017, kung saan binugbog ng artista hanggang malumpo ang isa pang pigura—bagaman animatronic ito—hanggang sa kontrobersiyal din niyang kampanya para sa Prada Spring/Summer 2026 na tinulungan ng AI, walang puwang ang kasiya-siyang paglutas sa pamamaraan ni Wolfson. Ngunit tila iyon nga ang punto ng pagkalitong ito, at gayon din ang masasabi sa nagpapatuloy niyang eksibisyon.

“Para sa akin, palatandaan iyon ng isang mahusay na obra, libro, o pelikula—gaya ng patuloy na pag-ukilkil sa akin ng mga nobela mo—dahil hindi naman sila mga bagay na kinakailangan kong maintindihan,” pagpapatuloy niya. “Sa totoo lang, napakaproduktibo ng pagkalitong iyon.”

Mapapanood ang eksibisyon sa New York hanggang Oktubre 24.

Gagosian
555 W 24th St,
New York, NY 10011