Pinakabagong Eskultura ni Banksy, Kahanay na ng Imperial Icons ng London

Buod

• Naglabas si Banksy ng isang bagong eskultura ng isang walang-mukhang tagapagdala ng watawat sa Waterloo Place sa London.
• Pinaghihinalaan ng mga tagahanga na ang piyesang nakapuwesto sa pagitan ng mga pigura ng makasaysayang ikonong British ay isang komentaryo kung paanong maaaring mabulag ng kapangyarihan ang mga indibidwal.

Katatanggap lang ng Central London ng isang bagong orihinal na gawa ni Banksy. Itinanghal ito sa Waterloo Place, isang lugar na may bigat sa kasaysayan, at inilalarawan ng eskultura ang isang naka-amerkanang pigura na nakapiring gamit ang sarili nitong watawat habang kumpiyansang nagmamartsa palayo sa pedestal nito.

Ibinalagbag ang obra sa plaza magdamag noong Miyerkules gamit ang crane. May nakasulat na “Banksy” sa paanan nito, at mabilis na napansin ang eskultura ng mga tagahanga ng mailap na street artist, na siyang nagkumpirma sa piyesa sa isang video na in-upload sa Instagram kanina.

Ang lugar na St James’s ay kilala sa mga monumento ng mga pigura ng imperyo ng Britanya. Nakatayo ang bagong Banksy sa tabi ng dambuhalang bronse nina Edward VII at Florence Nightingale, ng Crimean War Memorial, at ng isang ginintuan na Athena na tila naghahari sa harapan ng Athenaeum Club.

 

Tingnan ang post na ito sa Instagram

 

Isang post na ibinahagi ni Banksy (@banksy)

Ang paglalagay ng isang pigurang tulad nitong tagapagdala ng watawat sa hanay ng ganitong mga personalidad ay lantad na politikal at mapanulsol—na siya ring inaasahan sa artist. Maraming interpretasyon mula sa mga tagahanga ang nagmumungkahing ang estatwa ay isang komentaryo sa “bulag na nasyonalismo,” o kung paanong ang mga estrukturang may kapangyarihan ay maaaring walang-ingat na itulak ang sarili nila tungo sa sariling pagbagsak.

Hindi pa tiyak kung gaano katagal mananatili ang estatwa, pero kung pagbabasehan ang mga nauna ni Banksy sa London, mukhang hindi ito magtatagal. Noong nakaraang taon, ilang mural ng artist ang biglang sumulpot sa iba’t ibang bahagi ng lungsod, na nagtuon ng pansin sa mga paksang gaya ng protesta, tunggalian, surveillance, at uri sa lipunan. Noong Setyembre, isang imahen ng hukom na humahampas sa isang protestor ang lumitaw sa pader ng Royal Courts of Justice sa London, at ang pagtanggal nito ay naging kasing kontrobersyal ng mismong pagkakabit nito.