Mark Hamill, LEGO Star Wars, at ang Kinabukasan ng Laro

Mananatiling kakambal ni Mark Hamill ang Jedi magpakailanman, mula nang buhayin niya si Luke Skywalker para sa iba’t ibang henerasyon ng Star Wars. Ngayon, pumapasok siya sa isang bagong role, ngayon naman kasama ang LEGO bilang bagong hirang na Junior Executive Director of Information (J.E.D.I.) ng brand.

Kasabay ng pagbibigay ng titulong ito, inilulunsad ng LEGO ang SMART Play initiative, isang bagong platform na nakasentro sa interactive na pagbuo gamit ang sensor-driven nitong SMART Brick. Magde-debut ito sa LEGO Star Wars sets, kung saan ipinapakilala ng teknolohiya ang tunog, galaw, at pagiging responsive sa mismong karanasan ng pagbuo—pinagdudugtong ang pisikal na laro at makabagong interactivity.

Nakapanayam namin si Hamill sa pamamagitan ng LEGO fan hotline para pag-usapan ang ebolusyon ng paglalaro, ang walang kupas na hatak ng Star Wars, at kung ano ang ibig sabihin ng makipag-ugnayan sa bagong henerasyon ng mga builder.

 

Tingnan ang post na ito sa Instagram

 

Isang post na ibinahagi ng LEGO (@lego)

Malakas ang sense of humor ng LEGO. Paano mo nilapitan ang pagpasok sa J.E.D.I. role na ito?

Mark Hamill: Maliwanag na may sense of humor ang LEGO — binigyan nila ako ng titulong Junior Executive Director of Information! Ang brand na ito ay tungkol sa saya, at ang sarap maging bahagi ng isang bagay na mahal ng mga bata sa buong mundo.

Bilang magulang, lagi mong hinahanap ang mga paraan para makakonekta sa mga anak mo. Malalaki na ang mga anak ko ngayon, pero ang apong babae ko ay mahal na mahal ang LEGO, at ito ‘yung klase ng activity na talagang nagpapaliyab ng creativity. Ang tanging limitasyon lang ay ang imahinasyon mo.

Nakita mo nang umunlad ang Star Wars sa iba’t ibang henerasyon, at ngayon pati ang LEGO, sa pamamagitan ng SMART Play. Paano binabago ng isang bagay tulad ng SMART Play ang paraan ng pagkonekta ng mga tao sa Star Wars?

Kahanga-hanga ang SMART Play. ‘Yung mga tunog na ginagawa ng sets, mula sa laser hanggang sa usapan, sobrang galing. Noong una akong nagkaroon ng LEGO noong ’80s, kahon lang talaga ng mga brick iyon. Patuloy na umuunlad ang teknolohiya, at niyakap talaga nila iyon dito.

“Ang tanging limitasyon lang ay ang imahinasyon mo.”

Anong epekto ang naibibigay ng pagbuo ng isang pisikal na bagay gaya ng LEGO sa digital na mundo ngayon?

Mahalagang makahanap ng paraan para maalis ang mga bata sa kanilang mga telepono at maibalik sila sa totoong mundo. Perpektong paraan ito, kung saan nakikipag-interact ka sa anak mo at may ginagawa kayong isang bagay na nagpapa­limot sa kanila na online sila. Pinapanatili ng LEGO ang nakaraan, pero sa isang napaka-futuristic na paraan.

Ano ang pakiramdam na makita ang Star Wars at LEGO na pinagsasaluhan ng iba’t ibang henerasyon?

Espesyal ‘yon kapag may natuklasan kang isang bagay na puwedeng mag-enjoy ang buong pamilya. Naalala kong nanood ako ng mga palabas kasama ang mga anak ko na hindi ko sana papanoorin, *uhum* American Idol, dahil lang mahal na mahal nila iyon. Kapag may nakita kayong isang bagay na puwede ninyong sabay-sabay na i-enjoy bilang pamilya, wala iyong katumbas na halaga.

Bumalik ba ang mga alaala ng unang panahon mo sa Star Wars dahil sa pagtrabaho mo sa SMART Play sets?

Napanood ko lahat ng pelikula, pero hindi ko na sila binalikan. Noong i-re-release nila ang mga pelikula para sa ika-20 anibersaryo noong 1997, sabay-sabay na sumigaw ang tatlo kong anak, “Kailangan nating panoorin ‘yan!” Sabi ko sa kanila, “Paulit-ulit n’yo na ngang pinapanood ang mga ‘yan.” Si Nathan, manonood ng isa, i-re-rewind ang tape, tapos uulitin. Umabot sa puntong lumapit sa akin ang nakababatang kapatid niya at nagmakaawa, “Hindi ko na kaya. Ika-lima na ito ngayong araw na pinanood niya ang Empire Strikes Back.” May hatak sila sa bawat henerasyon, at lubos akong nagpapasalamat doon.

Hindi pa namin kailanman napanood ang mga pelikula sa isang malaking screen na may napakagandang sound, kaya sobrang nakaka-excite iyon. Pagkatapos ng muling panonood, naalala ko kung gaano sila kakusay at ka-talino pagkakagawa. Hindi ako bumabalik para panoorin ang mga proyektong ginawa ko, maliban na lang sa screenings o premieres. May mga pelikula pa rin akong nagawa na hindi ko pa nakikita. Hindi na ako magbabanggit ng pangalan, *uhum* The Guyver.

“Pinapanatili ng LEGO ang nakaraan, pero sa isang napaka-futuristic na paraan.”

Nakakita na tayo ng humigit-kumulang 70 unique na Luke Skywalker minifigure designs mula sa LEGO hanggang ngayon. Ano ang pakiramdam nang una mong makita si Luke Skywalker bilang isang minifigure?

Lagi kong na-a-appreciate na LEGO lang ang unang nakakuha nang tama sa kulay ng buhok ko. Noong una akong naging action figure, kulay lemon yellow ang buhok ko. Lagi kong iniisip kung bakit ganoon, samantalang kayumanggi ang buhok ko. Siguro nga medyo nag-blonde ito sa Tunisia, dahil laging nasa araw kami araw-araw nang ilang linggo. Pero noong una kong nakita ang LEGO, natuwa ako na ang dami nilang nakuha nang tama.

Kung may access si Luke Skywalker sa LEGO, ano sa tingin mo ang pinaka-e-enjoy niyang buuin?

Malamang na buuin niya ang bahay nila sa Tatooine, dahil nami-miss niya ang tiyo at tiya niya. Isa pa na talagang namumukod-tangi ay ang Emperor’s Throne Room, dahil isa iyon sa pinakamahahalagang tagpuan sa buong serye.