Nagbebenta ba ang Costco ng Off-White Hoodies?
Sa halagang $84.99 CAD ($62 USD), nagbebenta ang piling Costco Canada branches ng Off-White logo hoodies sa tatlong kulay.
Buod
- Matapos ang FW26 debut nito sa Paris, maglulunsad ang Off-White ng mas abot-kayang mga hoodie sa Costco Canada na nagkakahalaga ng humigit-kumulang $60 USD.
- Pagmamay-ari na ngayon ng Bluestar Alliance, ang pagtuon ng brand sa mas malawak na mass-market retail ay nagbubunsod ng debate tungkol sa magiging kinabukasan nito bilang luxury label at sa mga demokratikong pinagmulan nito.
Ang Off-White, ang label na itinatag ni Virgil Abloh bago siya pamunuan ang Louis Vuitton, ay kakapresenta pa lamang ng FW26 collection nito sa Paris Fashion Week, isa sa pinakamalalaking kaganapan sa taunang kalendaryo ng luxury industry. Kasabay nito, pumapasok naman ang brand sa isang mass-market retailer na mag-aalok ng mga produkto nito sa maliit na bahagi lamang ng karaniwang presyo.
Ang North American wholesale megastore na Costco ang pinakabagong stockist ng Off-White, isang patunay sa kasalukuyan nitong pagkahumaling sa streetwear. Matapos lumabas ang Nike Dunks at Comme Des Garçons Play Converse sa mga istante ng Costco, inanunsyo ng Costco Canada na ang piling lokasyon sa Canada ay malapit nang magbenta ng Off-White hoodies sa halagang $84.99 CAD o humigit-kumulang $60 USD. Ang mga hoodie ay available sa tatlong colorway: black, white, at blue.
Dahil sa demokratiko at people-oriented na diwa ng designer, ang pagpasok ng Off-White sa Costco ay tila isang hakbang na si Abloh mismo ang puwedeng nakaisip. Ang label ni Virgil Abloh ay matagal nang kilala sa hindi tradisyonal na approach nito, na sumasalamin sa streetwear roots ng founder na tubong Chicago. Madalas humiram ang designer ng mga simbolo at disenyo mula sa pang-araw-araw na buhay at inilalapat ang mga ito sa kanyang graphics at brand identity.
Noong 2024, ibinenta ng LVMH ang Off-White brand matapos lamang ang tatlong taon ng pagmamay-ari. Sa kasalukuyan, ang label ay pagmamay-ari ng brand management company na Bluestar Alliance, LLC, na kumakatawan sa mga brand na nasa kaparehong premium tier, tulad ng Palm Angels, pati na rin sa mga mass brand gaya ng Dickies.
Bagama’t madaling makita kung paanong swak sa identity ng brand ang presensya ng Off-White sa Costco, nagbubukas din ang balitang ito ng tanong kung ang layunin ba ng mga hoodie ay tunay na magpaangat ng sales o simpleng lumikha ng buzz. Higit sa lahat, pumupukaw ito ng kuryosidad kung saan eksaktong balak dalhin ng Bluestar Alliance ang brand sa hinaharap.
Tutok lang sa Hypebeast para sa pinakabagong balita at insight tungkol sa fashion industry.
