Ang EAH-A1000 ng Technics Ay Isang Hi-Fi Speaker Na Pinagkasya Sa Isang Pares Ng Headphones

Inilunsad ng Technics ang EAH-A1000, ang kanilang pinakabagong flagship wireless headphones na nakasentro sa bagong likhang 40 mm Magnetic Fluid Driver. Dinadala ng over-ear model na ito ang husay sa acoustic engineering mula sa speaker division ng brand patungo sa personal na audio, at ipinares ito sa isang makabagong Adaptive Noise Cancelling system at sa bagong disenyong Flow Arm headband.

Ang driver ang nagsisilbing puso ng buong disenyo nito. Bagama’t nakapagbibigay ng mas malakas na tunog ang malalaking drivers, mas mahirap din itong kontrolin—dahil anumang pagtabingi, panginginig, o pagbaluktot sa diaphragm ay nagiging sanhi ng distortion. Ang solusyon ng Technics dito ay ang magnetic fluid, isang materyal na kumikilos bilang magnet at likido nang sabay. Nakaposisyon sa pagitan ng voice coil at driver magnet, pinapatatag nito ang galaw ng diaphragm at pinipigilan ang hindi kanais-nais na vibration. Hindi na bago ang pamamaraang ito sa brand, na dati nang gumamit ng magnetic fluid tech sa kanilang mga in-ear model gaya ng EAH-TZ700 at EAH-AZ100, ngunit ito ang kauna-unahang pagkakataon na ginamit ito sa isang full-size na over-ear driver.

Sinusuportahan ang driver na iyon ng isang SST (Symmetrical Surround Technology) Edge, isang bahaging hinango mula sa mga Hi-Fi flagship speaker ng Technics. Dahil ginagawang mas pantay ang paggalaw paharap at patalikod ng surround habang hawak nito ang diaphragm, nababawasan ng edge ang distortion. Gawa naman sa carbon fiber ang mismong diaphragm, na napili dahil magaan at matibay ito, at hugis cone para maiwasan ang pagbaluktot sa mas malawak nitong surface. Tinawag ito ng Technics na “Pure Carbon Fiber,” isang terminong ginagamit ng brand upang ilarawan ang isang non-composite at non-laminated na pagkakabuo sa halip na gawa lamang sa carbon fiber. Ang pinagsamang layunin ng mga ito ay makamit ang mabilis at matatag na response ng driver na nagpapanatili sa lakas ng bass at lawak ng soundstage.

Binago rin ang acoustic path para maprotektahan ang kalidad ng tunog mula sa driver patungo sa tainga. Pinapakinis ng bagong Baffle Flat Structure ang mga bahaging nakapaligid sa driver upang mabawasan ang mga reflection na maaaring magpalabo sa tunog. Sa likod ng driver, isang Acoustic Control Chamber ang nag-aayos sa daloy ng hangin para panatilihing balanse ang low at midrange frequencies nang walang nangingibabaw na iisang sound band.

Ang noise cancelling naman ay pinangangasiwaan ng isang adaptive system na awtomatikong nag-a-adjust batay sa kapaligiran at kung paano nakasuot ang headphones sa ulo ng gumagamit. May tig-tatlong feed-forward microphone at isang feedback microphone ang bawat ear cup—walo lahat-lahat—na sabay-sabay na gumagana para sagapin at pahinain ang ingay mula sa iba’t ibang direksyon. May hiwalay at sariling teknolohiya rin para sa mas malinaw na mga tawag gamit ang AI Beamforming.

Nagbibigay rin ang disenyong ito ng isang bagong visual reset para sa flagship model. Mula sa hugis parisukat sa bahagi ng slider, nagiging hugis tatsulok ang bagong Flow Arm pagdating sa hanger, at dahil sa single-sided support nito, nagkaroon ng mas magaan at mas makinis na hitsura ang pamilyar na bilugang housings ng Technics. Gumamit ng bakal para sa arm at sa top panels ng bawat housing para pinalutang ang ganda ng raw material, habang pinanatili ang kilalang circular machining ng brand. Maaaring itupi ang headphones at may kasama itong sariling carrying case kapag binili.

Muling binuo mula sa umpisa ang aspeto ng ginhawa. Ang mas malawak at na-optimize na paggalaw ng ear cup, mas magandang hugis ng headband, at mas pinong slider adjustment ay pantay na namamahagi ng presyon sa iba’t ibang hugis ng ulo, habang ang high-density memory foam ear pads ay idinisenyo upang tumagal sa mahabang oras ng paggamit nang hindi nababawasan ang pagiging malambot nito.

Sa aspeto naman ng connectivity, sumusuporta ang EAH-A1000 sa high-resolution playback gamit ang LDAC at lossless listening sa pamamagitan ng USB Audio, kasama na ang Dolby Atmos optimization na may head tracking. Umaabot ng hanggang 45 oras ang buhay ng baterya para sa tuloy-tuloy na pakikinig, at kayang ikonekta sa tatlong device nang sabay gamit ang multipoint pairing. Nananatiling pisikal ang mga button na mayroon ding slide control, habang nagdadagdag naman ng Sound Share feature ang Technics Audio Connect app. May dalawang kulay na mapagpipilian: Black at Platinum Greige, isang bagong banayad na kombinasyon ng kulay abo at beige para sa line-up na ito.

Maaari nang mabili ang A1000 ngayon sa pamamagitan ng Technics.