Ang Manual Photo Lab Ang Bagong 'It' Spot ng NYC Chinatown

Mahal ng New York ang Manual, at mahal din ng Manual ang New York. Mula nang maitatag ito halos isang dekada na ang nakalipas, nanatiling tapat ang label sa core creative community nito, mula sa mga photo buff hanggang sa mga photo-curious, na patuloy na naghahatid ng mga pop-up, party, at show sa iba’t ibang panig ng lungsod. Ngayon, sa pagbubukas ng Manual Photo Lab, ang pinakauna nitong permanenteng espasyo, mayroon nang pormal na tambayan ang mga day-one supporter at pati na rin ang mga first-timer.

Ang 400-square-foot na espasyo sa Chinatown ay hango sa mga mom-and-pop camera store kung saan lumaki ang founder na si Malcolm Dia—mga lugar na hindi lang nagbebenta ng equipment, kundi nagsisilbi ring tagpuan para sa mga artist na lubos na nakatutok sa kanilang sining. “Doon nagkikita ang mga tao, nagpapalitan ng tips, at kumukuha ng na-develop nilang film. Sa tingin namin ay may malaking demand para sa ganitong klaseng lugar, lalo na sa mga mas nakababata na muling nahihilig sa pag-camera,” aniya.

Sa mga estante, katabi ng mga digital at disposable camera ng brand—na parehong may iba’t ibang colorway—ang mga Kodak film stock, libro, zine, at merch mula sa mga lokal at internasyonal na publisher, tulad ng Loose Joints, Super Labo, Pomegranate Press, Monolith Editions, at Dobedo UK. Nag-o-offer din sila ng film processing, kung saan ang 35mm color development ay nagsisimula sa $15 na may two- hanggang three-business-day na turnaround.

Inilunsad ang espasyo sa pamamagitan ng isang exhibition na iprinesenta kasama ang Silvertooth Agency, na nagtatampok ng orihinal na painting ni Leon Xu at mga gawa ng iba pang emerging artist. Asahan din ang marami pang paparating na exhibition, zine launch, DJ set, at workshop.

Pagdating naman sa disenyo, ito ay likha ng Protean Practice, na sinadyang magmukhang tulad ng mga see-through na “HOLO” digicam: pinapanatili ng mga clear panel sa harapan ang orihinal na facade at 19th-century brickwork ng gusali, habang hinahayaan ng isang semi-sheer curtain na pumasok ang liwanag mula sa film lab hanggang sa loob. Ang raw steel at roughened plywood ay nagbibigay ng naka-istilong industrial touch, na kinumpleto pa ng custom speaker system at reading bench na matatagpuan sa gilid ng store.

Malayo na ang narating ng Manual mula sa kanilang pop-up coffee counter at film drop-off window noong tag-init ng 2019, na matatagpuan lang malapit sa bago nilang lokasyon. Pero kahit noon pa man, alam na nila kung paano humakot ng atensyon ng publiko.

Sinadyang piliin ang Chinatown, dahil na rin sa kasaysayan ng lugar na puno ng mga family-run business, photo studio, at print shop. “Bago lang kami rito, kaya responsibilidad naming maging isang mabuting kapitbahay,” sabi ni Dia. “Ibig sabihin nito, dapat bukas kami sa lahat, abot-kaya ang presyo ng lab para magamit talaga ito ng mga tao, at magbigay kami ng espasyo para sa mga lokal na photographer at artist.”

Bukas mula Martes hanggang Linggo, mula 11 AM hanggang 7 PM, bisitahin ang store upang makita ito nang personal.

Manual Photo Lab
85A Allen Street,
New York, NY 10002