Ang Bagong Coffee Painting ni Chase Hall ay Sumisid sa Kasaysayan ng Black Appalachia

Minsang ibinahagi ni Chase Hall, ang Amerikanong artist na kilala sa kanyang mga painting na gawa sa bagong timplang kape, na nakagagawa siya ng hanggang 100 espresso shots para sa iisang obra. Ang paggamit niya sa kakaibang materyal na ito ay nag-ugat sa kanyang karanasan bilang isang barista. Subalit, ang mga nabuong kulay ng amber at burnt umber ay nagpapahiwatig nang higit pa sa kanyang hilig dito—dinala siya ng mga ito sa malalalim na kasaysayan ng kolonyalismo, kalakalan, at paggawa.

Kamakailan ay pinili ng Parrish Art Museum at The FLAG Art Foundation si Hall upang lumikha ng isang bagong painting para sa pinakabagong FRESH PAINT exhibition, na bukas hanggang Enero 25, 2027. Tampok sa obrang “The Affrilachian Mountains” (2026) ang isang grupo ng mga minero, na sumasalamin sa post-abolition period kung saan libu-libong African American ang dumayo sa Appalachians upang maghanap ng trabaho sa mga minahan ng karbon.

Tulad sa maraming masisiglang obra ni Hall, gumagamit ang base nito ng acrylic at kape—tinimpla at sinunog upang makuha ang matitingkad na kulay—sa ibabaw ng unprimed canvas, na tila sumasabog sa puting pintura. Tampok din sa partikular na obrang ito ang iba’t ibang found objects—mga antigong kagamitang pang-agrikultura at kinalawang na lata na dating pinaglagyan ng kape, tabako, at malt liquor—na lalong nagbibigay-diin sa mga sugat ng kasaysayang Amerikano pagdating sa kalakal, pagmimina, at lahi.

Dahil siya ay biracial, karamihan sa mga likha ni Hall—na tumatalakay mula sa mga personal hanggang henerasyonal na kuwento ng paggawa at paglilibang—ay nagbibigay-buhay sa konsepto ng dualidad. Hindi lamang nito pinoproseso ang pagiging nasa gitna, kundi pati na rin ang mga panuntunan at kondisyong nakakabit sa pagkakakilanlan ng lahi. “May hindi maikakailang diwa ng kalayaan sa mga eksenang ito, kung saan ang pagkakakilanlan ay hindi nakakulong sa mga limitasyon at klasipikasyon,” isinulat ng Parrish Art Museum, “kundi isang espasyo ng mga walang-hanggang posibilidad.”

“Sa huli, pinagkakatiwalaan ko talaga ang ginagawa ko sa aking studio, pati na ang mensaheng gusto kong iparating; ang sining ko ay tungkol sa pagbibigay-espasyo para sa aking nakababatang sarili, pati na rin sa pagbuo ng mas bukas, mapanuri, at malalim na mundo,” dagdag ni Hall sa isang panayam kasama ang manunulat at curator na si Ekow Eshun. “Ito ang aking teritoryo. Kaya kong sumigaw pabalik sa mundo, at umaasa akong nakalilikha ito ng pagbabago para maging mas mabuti ito kaysa sa aking dinatnan.”

Ang bersyon ni Chase Hall ng FRESH PAINT ay tampok na ngayon sa New York.

Parrish Art Museum
279 Montauk Hwy,
Water Mill, NY 1197