Off-White™ Spring 2026: Bumalik sa Eskuwela
Sinakop ng label ni Ib Kamara ang rooftop basketball court ng New Design High School sa New York para sa isang kaleidoscopic na fashion show na ipinagdiriwang ang Black excellence.
Noong Biyernes ng hapon, ginawang technicolor runway ng Off-White™ ang rooftop basketball court ng New Design High School sa New York para sa kanilang Spring 2026 show na pinamagatang “Pop Romance.”
Binalot ang venue ng mga graffiti mural na hango sa limang borough ng New York City—isang pagpupugay sa isa sa maraming “signatures” ng yumaong tagapagtatag na si Virgil Abloh—na ipininta ng mga lokal na artist na sina Daze, Lady Pink, Mast at CES. Sa pagitan ng mga ito, naglakad nang todo-swag ang mga likha ng kasalukuyang designer na si Ib Kamara, kasing-makulay ng isang kaleidoscope. Sa season na ito, ipinagdiwang ng kaniyang manifesto ang laki ng ambag ng Black culture sa pop culture, tampok ang matingkad na wardrobe na hango sa ’70s—panahong binasag ng mga African creative ang disco, hip-hop at streetwear sa pamamagitan ng kanilang di-matitinag na determinasyon.
“Tawagin itong imbensiyon bilang anyo ng paglaban, at personal na ekspresyon bilang paraan para makaligtas,” sulat ni Kamara sa kaniyang show notes. “May buhay-na-buhay na puwersang patuloy na nagpapalakas sa pagnanasang ito. Pinapatakbo ng koleksiyong ito ang kaparehong enerhiya at diwa, pero wala rito ang anumang bahid ng nostalgia. Ang habol ko ay ang kaba, ang pagkaapurado at presensiyang tunay na New York.”
Flared na silweta at sheer satin ang nagdomina sa koleksiyon, habang ang prismatikong tailoring ay nagbigay ng matalas pero sobrang satisfying na finish sa karamihan ng mga look. Bukod pa rito, tampok ang mga mapangahas na varsity jacket—isang Off-White™ signature—na lalong bumagay sa akademikong setting. May pasilip din sa isang collab kasama ang New York Liberty, na dumribol pababa sa court-runway habang kinukunan ito ng video ni Ellie the Elephant, ang mascot ng koponan, mula sa front row.
“Sa muling pagbalik sa mga ugat ng Black culture sa lungsod, nagkakaroon tayo ng malaking hakbang pasulong—ibinibida ang romansa kung saan naroon ang pop,” pagtatapos ni Kamara.
Silipin ang Spring 2026 collection ng Off-White™ sa gallery sa itaas.
Tingnan ang post na ito sa Instagram