Mga Nagwagi ng LVMH, Karl Lagerfeld at Savoir-Faire Prize, todo-savor sa kanilang tagumpay

Habang naghahanda ang malalaking fashion house na ilunsad ang kanilang unang koleksiyon sa ilalim ng mga bagong creative director, patuloy ding umaarangkada ang pag-usbong ng mga bagong talento. Nitong Setyembre 3, idinaos ng LVMH ang taunang LVMH Prize for Young Designers sa Fondation Louis Vuitton, kung saan iniharap ng mga up-and-coming designer ang kanilang mga obra sa isang huradong binubuo ng siyam na creative director mula sa iba’t ibang LVMH house—Jonathan Anderson, Sarah Burton, Marc Jacobs, Nicolas Ghesquière, Stella McCartney, Nigo, Phoebe Philo, Silvia Venturini Fendi at Pharrell Williams—kasama sina Delphine Arnault, Jean-Paul Claverie, Sidney Toledano at Bollywood actress Deepika Padukone.

Binuksan ni Arnault ang programa sa ilang pananalita bago iabot ang LVMH Prize kay Soshi Otsuki para sa kanyang tatak na Soshiotsuki, at ang Karl Lagerfeld Prize kay Steve O Smith para sa kanyang eponymous label. Nasungkit naman ni Torishéju Dumi ng Torishéju ang Savoir-Faire Prize, isang parangal na nagbibigay-diin sa sustainable na inobasyon at pambihirang craftsmanship. Matapos ang anunsyo, nakipag-kuwentuhan ang Hypebeast sa bawat nagwagi upang alamin ang kahulugan ng milestone na ito para sa kanila at kung ano ang kanilang makukuha mula sa mentorship.

Kalakip ng LVMH Prize ang €400,000 at isang taong mentorship program kasama ang mga dalubhasa ng LVMH. Nakasuot ng head-to-toe Louis Vuitton, iniabot ni Padukone ang tropeo sa 35-anyos na designer na si Soshi Otsuki. Kilala si Otsuki sa menswear na may napakahusay na tailoring; kahit nakikipagsabayan siya sa global market, dama pa rin sa bawat piraso ang kanyang Japanese heritage na lalong pinatingkad ng premium na materyales. Layunin niyang i-scale ang brand sa tulong ng mentorship na ito—mula sa de-klaseng suit patungo sa pang-araw-araw na piraso para kumpletuhin ang kanyang line-up. Sampung taon na ring nakalipas nang mapasama siya sa shortlist ng parehong parangal, kaya’t tunay na full-circle ang panalong ito.

“Malaki na ang in-improve ng kalidad ng mga produkto ko mula noon. Mananatili pa rin ang focus ko sa tailoring, pero ngayon nakikita kong kailangan kong palawakin ang vision ng brand para maabot ang mas marami,” ani Otsuki. “Gusto kong magdisenyo ng mas casual na piraso na puwedeng iterno sa mga suit. Sa ngayon, mag-isa kong hinahawakang lahat, kaya balak kong mag-build ng team, kumonsulta tungkol sa merchandising at alamin kung paano lalawak sa global market.”

Nasungkit ng British designer na si Steve O Smith ang Karl Lagerfeld Prize dahil sa kaniyang intricately crafted couture pieces; kalakip nito ang €200,000 na pondo at isang taong mentorship mula sa LVMH Group. Bago itayo ng 33-anyos ang kanyang eponymous menswear at womenswear label, nag-aral siya sa Central Saint Martins. Detalyado ang kanyang proseso: mula sa pahina ng sketchbook, binubuhay niya ang mga guhit sa pamamagitan ng appliqué at malikhaing konstruksyon, hinuhubog ang mga ito bilang pattern. Ikinuwento niya kung paano niya balak pang i-level up ang prosesong ito sa gabay ng LVMH.

“Ang pinakagusto ko sa proseso ko ay dahil napakarami kong iginuguhit, tuluy-tuloy ding nagbabago at umuusbong ang mga disenyo,” ani Steve. “Hanggang ngayon, parang panaginip pa rin ang lahat. May production bottleneck kami—mas marami ang order kaysa sa kaya naming tapusin. Kaya, diretsahan na, gagamitin ko ang pondo para ayusin iyon: bumili ng kinakailangang makina at kumuha ng mas maraming mananahi. Kailangan naming mag-expand, at ‘yan ang pagtutuunan ko.”

Muling nagtagumpay para sa England, inuwi ni Torishéju Dumi ng label na Torishéju ang Savoir-Faire Prize. Bilang premyo, tatanggap ang 32-anyos na designer ng womenswear at menswear ng €200,000, isang taong mentorship mula sa LVMH, at suporta mula sa LVMH Métiers d’Excellence sa pakikipagtulungan sa embroidery specialist na Maison Vermont—kabilang dito ang €50,000 halaga ng embellishments para sa kanyang susunod na koleksiyon. Tubong North London, hangad ni Dumi na laging ipinta sa kanyang mga disenyo ang pinaghalong Nigerian at Brazilian na pinagmulan. Humuhugot siya sa mga kuwento ng pamilya, relihiyon at espiritwalidad, kaya’t nagiging mala-eskultura ang kanyang mga damit.

Kwento ni Dumi, “Nakaugat ang brand sa obsesyon sa hugis, anyo at tekstura. Kinukuha namin ang mga klasikong piraso at banayad naming pinapalabis ang proporsyon hanggang magkaroon ka ng kakaibang pakiramdam—alam mo kung ano iyon, pero may kung anong hindi pangkaraniwan. Layunin naming makalikha ng mga walang-panahong piraso na kusang bumabagay sa iyong wardrobe,” dagdag pa niya. “Napakagandang karangalang ito dahil mahal na mahal ko ang craft. Gumagawa ako gamit ang aking mga kamay, at ang binubuo ko’y nakaugat sa kasaysayan—na labis kong kinagigiliwan. Para sa akin, mahalagang kilalanin ang nakaraan upang maunawaan ang kasalukuyan at matukoy ang patutunguhan, at iyon mismo ang ibig sabihin ng craft.”

Makakatanggap din ang bawat nagwagi ng allowance mula sa Nona Source, isang platapormang nag-u-upcycle ng deadstock materials mula sa mga Fashion at Leather Goods brand ng grupo bilang pagsulong ng circularity. Bilang pagtulong sa susunod na henerasyon ng creatives, kinilala rin ng seremonya ang tatlong bagong graduate ng fashion—si Louna Clouzel ng La Cambre (Brussels), Sophia Sacchetti ng Parsons Paris at Peiwen Mao ng Royal Academy of Fine Arts, Antwerp. Tatanggap ng tig-€10,000 ang mga lumalabas na designer at ang kanilang mga paaralan, bukod pa sa pagkakataong mag-intern sa mga studio ng Kenzo, Louis Vuitton Homme at Dior womenswear.

Hindi pa dito nagtatapos ang kuwento ng mga nagwaging ito—abangan ang kanilang mga susunod na koleksiyon.