Pasilip sa Off-Duty Style ni LISA sa Bagong Auction ng JOOPITER
Tampok ang ilan sa paboritong piraso ni LISA mula CELINE, Balenciaga at iba pa.
Opisyal na inanunsyo ng JOOPITER at ng kilalang rapper, singer at style icon na si LISA ang bagong auction na pinamagatang “LISA: Off Duty.” Sa nalalapit na event, magkakaroon ang fans ng pagkakataong silipin ang personal niyang estilo at designer collection—at ng bihirang chance na makakuha ng pirasong direktang galing sa kanyang wardrobe. Tampok dito ang sari-saring item, mula sa mga ready-to-wear at handbag hanggang sa designer na sapatos at sneakers.
Kabilang sa mga standout ng koleksyon ang oversized Vetements x Alpha Industries bomber jacket, isang Balenciaga camouflage overshirt at isang CELINE sequin turtleneck romper—mga pirasong sumasalamin sa pamatay niyang fashion sense. Kasama rin sa lot ang ilang pares ng sapatos tulad ng CELINE loafers at Balenciaga Tyrex sneakers. “Tagahanga ako ni Pharrell kaya excited akong makipag-collab sa kanya at sa JOOPITER para sa eksklusibong auction na ito, para mabigyan ang mga fan ng access sa ilan sa pinaka-paborito kong piraso mula sa closet ko,” ani LISA.
Ayon kay Pharrell Williams, founder ng JOOPITER, “Sa JOOPITER, binibigyang-liwanag namin ang mga kuwento na humuhubog sa kultura—at ang kay LISA ay talagang tumitimo. Bawat piraso sa koleksyong ito ay isang sandali mula sa kanyang paglalakbay, at karangalan naming maibahagi iyon.”
Sabi naman ni John Auerbach, CEO ng JOOPITER, “Sobrang excited kaming makipag-partner kay LISA para sa pagbebenta ng kanyang fashion archive. Gusto rin naming bigyan ng chance ang fans niya sa buong mundo na makuha ang mga one-of-a-kind na item na ito.”
Tingnan ang mga pirasong naka-feature sa itaas. Bukas na para sa global bidding ang auction sa JOOPITER.com hanggang Setyembre 10.