Pumanaw na si Giorgio Armani sa edad na 91

Kinumpirma ng kumpanya nitong Huwebes na pumanaw na ang Italianong fashion designer na si Giorgio Armani sa edad na 91.

Sa isang pahayag, sinabi ng Armani Group: “Sa walang kapantay na dalamhati, inihahayag namin ang pagpanaw ng aming lumikha, tagapagtatag at walang kapagurang puwersa—si Giorgio Armani,” dagdag pa ng fashion house, “payapa siyang pumanaw na napapalibutan ng kaniyang mga mahal sa buhay.”

Sa loob ng limang dekada, si Giorgio Armani ang nagtaktak sa Milanese style sa paraang halos walang makapantay. Dating window dresser, hinubog niya ang sarili bilang isang self-made visionary at nagtayo ng isang multi-bilyong dolyar na imperyong sumasaklaw hindi lang sa fashion kundi pati sa pabango, pampaganda, interior, hospitality at dining. Ang kaniyang pinasimpleng, malambot na tailoring ang nag-rewrite sa mga patakaran ng power dressing noong ’80s, at siya ang unang nakipag-ugnayan sa mga A-lister ng Hollywood bago pa man ang kaniyang mga kapanahon, dinadamitan ang mga bituin habang nagiging isa rin siyang bituin. Sa lawak ng impluwensiya niya sa pananamit ng kalalakihan at kababaihan, binansagan siya bilang “Re Giorgio,” o “King Giorgio.”

“Sa kumpanyang ito, palagi naming naramdaman na kami’y bahagi ng isang pamilya,” ayon sa pahayag ng mga empleyado at pamilya ni Armani. “Ngayong araw, labis naming nararamdaman ang puwang na iniwan ng taong nagtatag at nag-alaga sa pamilyang ito sa pamamagitan ng bisyon, pasyon at dedikasyon. Ngunit sa mismong diwang iyon, kami—ang mga empleyado at mga kapamilya na matagal nang nagtrabaho sa tabi ni G. Armani—ay nangakong pangangalagaan ang kaniyang ipinundar at itataguyod ang kompanya sa kaniyang alaala, nang may paggalang, pananagutan at pagmamahal.”

Magbubukas ang isang funeral chamber mula Sabado, 6 Setyembre, hanggang Linggo, 7 Setyembre, sa Via Bergognone sa loob ng Armani/Teatro at tatanggap ng mga nakikiramay mula 9 a.m. hanggang 6 p.m. CEST. Isasagawa nang pribado ang libing.