Mas dinagdagan ni Ariana Grande ang mga petsa ng 'Eternal Sunshine' North American Tour

Buod

• Nagdagdag si Ariana Grande ng siyam pang show sa kaniyang 2026 Eternal Sunshine na tour
• Ito ang una niyang tour sa loob ng pitong taon, matapos siyang magpokus sa pag-arte
• Ang natitirang ticket para sa mga bagong petsa ay mapupunta sa general sale sa Setyembre 10

Opisyal nang balik sa touring ang pop superstar na si Ariana Grande. Matapos ang pitong taong pahinga, nagdagdag siya ng siyam pang petsa sa North American leg ng kaniyang 2026 Eternal Sunshine na tour dahil sa matinding demand. Ito ang unang beses muling tumuntong si Grande sa entablado mula nang matapos ang huling tour niya noong Disyembre 2019, bilang suporta sa kaniyang Sweetener at Thank U, Next na mga album.

Dumating ang balitang ito matapos lumabas si Grande sa MTV Video Music Awards nitong nagdaang weekend upang ihandog kay Mariah Carey ang Video Vanguard Award. Nasungkit din niya ang parangal para sa Brighter Days Ahead—ang kaakibat niyang sci-fi short film para sa 2024 album niyang Eternal Sunshine. Ngayong taon, muling inilabas niya ang Eternal Sunshine Deluxe: Brighter Days Ahead na album.

Nagsimula ang pre-sale ng ticket para sa tour nang madaling-araw nitong Martes, at ang natitirang ticket ay mapupunta sa general sale sa Setyembre 10. May inihandang iba’t ibang VIP package at experience ang tour. Kamakailan, naka-focus si Grande sa kaniyang acting career habang nagshu-shoot at nagpo-promote ng Wicked: For Good, kaya ang pagbabalik niya sa entablado ay talagang monumental para sa kaniyang loyal na fanbase.

Nakakalat ang mga bagong show sa iba’t ibang bahagi ng U.S. at Canada, kaya mas maraming fans ang magkakaroon ng pagkakataong maranasan ang kaniyang comeback. Narito ang mga bagong petsa:

Oakland (Oakland Arena, June 10)
Los Angeles (Kia Forum Arena, June 20)
Austin (Moody Center, June 27)
Sunrise (Amerant Bank Arena, July 3)
Atlanta (State Farm Arena, July 9)
Brooklyn (Barclays Center, July 19)
Boston (TD Garden, July 25)
Montreal (Bell Centre, July 31)
Chicago (United Center, August 6)