Korte sa South Korea: May Bisa ang Kontrata ng NewJeans sa ADOR Hanggang 2029

Buod

• Pinagtibay ng Seoul Central District Court na mananatiling may bisa hanggang 2029 ang kontrata ng NewJeans sa ADOR
• Ibinasura ng korte ang kahilingan ng grupo na wakasan ang kontrata at sinabing ang pagkakatanggal sa tungkulin ng dating CEO ay hindi paglabag
• Nakatuon na ngayon ang ADOR na ipagpatuloy ang mga aktibidad ng NewJeans, kabilang ang paglabas ng isang full-length album

Matapos halos isang taon, natalo ang NewJeans sa legal na laban kontra sa label na ADOR.

Opisyal na pinasya ng Seoul Central District Court na mananatiling may bisa hanggang 2029 ang kontrata ng grupo sa ADOR. Inilabas ang pasyang ito ilang buwan matapos tanggihan ng Seoul High Court ang apelang inihain nina Hanni, Hyein, Haerin, Danielle at Minji para wakasan ang kanilang eksklusibong kontrata sa label. Ibinasura rin ng korte ang pag-angkin ng NewJeans na ang pagkakatanggal sa mentor ng grupo at dating CEO ng label na si Min Hee-jin ay paglabag sa kontrata.

Nagbahagi ang ADOR ng pahayag:

“Hello, ito ang ADOR.

Ngayong araw (Oktubre 30 KST), nagpasya ang korte sa Korea sa kasong nagkukumpirma sa bisa ng eksklusibong kontrata sa pagitan ng ADOR at ng aming artista, ang NewJeans, at pinagtitibay na nananatiling may bisa ang naturang eksklusibong kontrata sa pagitan ng dalawang panig.

Napagpasiyahan ng korte na walang nilabag ang ADOR sa mga tungkulin nito bilang ahensiyang namamahala, at na ang mga pagtatangkang buwagin ang eksklusibong kontrata sa pamamagitan ng pagpapakitang tila naputol ang tiwala ay hindi dapat pahintulutan. Lubos kaming nagpapasalamat sa pasya ng korte.

Mula nang ihayag ng NewJeans ang isang-panig na pagwawakas ng kontrata noong nakaraang Nobyembre, maingat naming sinubaybayan—at mabigat sa loob na hinarap—ang sunud-sunod na proseso. Kabilang dito ang pangunahing kaso, ang aplikasyon para sa injunction upang maiwasan ang kalituhan sa merkado, ang pag-apruba ng korte sa nasabing injunction, ang agarang apela ng artista, at ang desisyon ng korte na ibasura ang apelang iyon. Sa loob ng halos isang taon, paulit-ulit na ipinasiya ng mga korte sa iba’t ibang kaugnay na kaso na ang label ang nananatiling ahensiyang namamahala sa ilalim ng eksklusibong kontrata, at na dapat makibahagi ang artista sa mga aktibidad sa entertainment kasama namin.

Taos-puso kaming umaasa na ang hatol ngayong araw—na dumaan sa matagal na beripikasyon ng iba’t ibang pahayag at mga katotohanan at muling nagpapatibay sa mga naunang pasya—ay magsilbing pagkakataon para sa mga artista na mahinahong magnilay sa usaping ito.

Nakatuon ang ADOR na muling igiit ang papel at mga pananagutan nito bilang ahensiyang namamahala sa NewJeans. Gaya ng aming sinabi sa paglilitis, kumpleto na ang aming paghahanda para sa mga aktibidad ng artista, kabilang ang paglabas ng isang studio album, at kami’y nakahandang magsimula. Gagawin namin ang lahat upang makabalik sa mga tagahanga sa pamamagitan ng pakikipag-usap sa artista.

Maraming salamat.”

Noong Nobyembre 2024, ibinunyag ng NewJeans ang kanilang planong kumalas sa ADOR, sa pagsasabing masama ang pagtrato ng label sa kanila at sa kanilang staff, kabilang ang “walang katapusang mga paghahadlang at salungatan, sinadyang miscommunication, at manipulasyon sa iba’t ibang larangan.” Dagdag ni Hanni, ang label ay “isang kumpanyang wala nang anumang sinseridad sa sining ng musikang nililikha, mas nakatuon sa pagpapakitang maayos gumagana kahit ang iniisip lamang ay kumita, at walang konsensya sa negatibong epektong nililikha nila sa pamamagitan ng hindi tunay na mga paraan.” Tumugon ang ADOR at sinabing ang kasunduan sa pagitan ng label at ng NewJeans ay “nananatiling ganap na epektibo.”

Noong Pebrero 2025, nag-rebrand ang grupo bilang NJZ, ngunit pagkalipas ng isang buwan ay pumabor ang Seoul Central District Court sa ADOR bilang kanilang eksklusibong ahensiya. Nag-anunsyo ang NewJeans ng hiatus makalipas nito.