Narito na ang Opisyal na Trailer ng ‘Stranger Things’ Season 5
Buod
- Ang Stranger Things Season 5 inilabas na ang trailer, at ang kuwento’y itinakda noong taglagas ng 1987, sa gitna ng pagbubukas ng mga Rift
- Nagsisimula ang season sa gitna ng kaguluhan: nagtatago si Eleven at nasa ilalim ng kuwarentenas ng militar ang Hawkins
- Papalapit na ang huling laban; kakailanganin ang “full party” na magkaisa laban sa isang makapangyarihang bagong kadiliman
Sa wakas, inilabas na ng Netflix ang opisyal na trailer para sa lubos na inaabangang Stranger Things season five. Ang nalalapit na huling season ay hahatiin sa dalawang volume, at ang finale ay mapapanood din sa piling sinehan.
Ang Season 5 ng matagal nang tumatakbong serye ay nagaganap noong taglagas ng 1987. Patuloy pa ring bumabangon ang bayan ng Hawkins mula sa pagbubukas ng mga Rift. Determinado ang mga kabataang karakter na hanapin at pabagsakin si Vecna, na simula noon ay naglaho. Samantala, pinaigting ng gobyerno ang paghahanap kay Eleven at isinailalim ang Hawkins sa kuwarentenas ng militar.
“Habang papalapit ang anibersaryo ng pagkawala ni Will, dumarating din ang mabigat, pamilyar na pangamba. Papalapit na ang huling laban — at kasama nito, isang dilim na mas makapangyarihan at mas nakamamatay kaysa sa anumang hinarap nila noon,” dagdag pa sa buod. “Para tuldukan ang bangungot na ito, kakailanganin nila ang lahat — ang “full party” — na magsama-sama, sa huling pagkakataon.”
“Sa tingin ko, ang kakaiba sa season na ito ay nagsisimula ito sa kaguluhan dahil sa huli, natalo ang ating mga bayani sa dulo ng Season 4. Kadalasan, inilalatag muna namin ang normal nilang buhay at kung paano sila sa eskuwela, saka namin ipinakikilala ang supernatural na elemento. Pero sa pagkakataong ito, kumakaripas na agad ang season mula sa simula,” pahayag ng co-creator na si Ross Duffer. Dagdag ni Matt Duffer,
“Hindi sila namumuhay nang normal. Wala nang normal sa Hawkins… limitado ang kanilang galaw, at may mga camera ng Big Brother kahit saan. Kaya hindi lang sila abala — ang araw-araw nilang buhay ay malayo na sa normal.”
Sinabi ng executive producer at direktor na si Shawn Levy, “Next level ang aksyon, next level ang visual effects, pero ikinagagalak ko ring sabihin na nananatiling pareho ang emosyonal na sentro. At bahagi ng mahika ng palabas na ito ang katotohanang kahit umuunlad tayo, kahit nagiging mas epiko ang pagkukuwento, laging nakaangkla ito sa mga karakter na mahal natin.”
Silipin ang trailer sa itaas. Stranger Things Season 5 Volume 1 magpe-premiere sa Nobyembre 26, kasunod ang Volume 2 sa Pasko at The Finale sa Bisperas ng Bagong Taon.
