Ibinabahagi ni BamBam ng GOT7 ang Thailand sa mundo sa kanyang pag-usbong bilang solo artist

Miyembro ng GOT7 at solo artist, kasalukuyang nagtatakda si BamBam ng sariling direksiyon—isang paglalakbay na humantong sa kanyang natatanging solo sound at isang malaking kolaborasyon sa JOOPITER, ang bahay-subasta ni Pharrell Williams. Para sa rapper, ang kanyang malikhaing ebolusyon ay pag-iwas sa pagkakahon sa iisang genre, habang pinananatili ang isang agad makikilalang istilo na, walang pasubali, kanya.

Pinalalawak niya ang impluwensiya sa pamamagitan ng mga kolaborasyon, kabilang ang nalalapit na JOOPITER auction kasama ang mentor na si Pharrell Williams. Nakikita ni BamBam ang sarili bilang tulay sa dalawa niyang “hometowns” —Korea at Thailand. Nakipag-usap siya sa Hypebeast sa isang eksklusibong panayam sa kanyang JOOPITER exhibit, kung saan ibinunyag niya ang ilan sa mga pinakaminamahal niyang piraso bago ang auction. Pinamagatang BamBam: From the Stage and Beyond, sumasabay ang pagdaraos ng auction sa paglabas ng kanyang kauna-unahang Thai album HOMETOWN, na nagbibigay sa mga tagahanga ng bihirang sulyap sa kanyang mundo. Mula sa mga personal na artifact hanggang sa performance pieces, ipinagdiriwang siya ng auction—sa entablado man o sa likod nito. Kaakibat ng auction, nakipagkuwentuhan si BamBam sa Hypebeast tungkol sa paglikha ng isang album na tahasang itinatanghal ang Thailand, ibinabahagi sa kanyang mga tagahanga ang ilan sa pinaka-intimong bahagi ng kultura. Silipin ang kanyang mga ibinahagi—mula sa pagtatrabaho sa album na ito kasama si Pharrell hanggang sa kung ano ang kahulugan nito para sa kanya.

Hypebeast: Ang solo work mo ay may tatak na estilong kaiba sa musika mo kasama ang GOT7. Paano mo ilalarawan ang ebolusyon ng iyong tunog?

BamBam:Pakiramdam ko, lagi na akong may sariling tunog. Hindi ako nagpapakulong sa iisang estilo, pero sa sandaling pakinggan mo, alam mong si BamBam ’yan.

Paano ang naging proseso ng paglikha, at may mga tiyak ka bang tema o kuwentong nais mong isalaysay sa pamamagitan ng bagong album?

Gusto kong makita ng mga tao ang Thailand na tunay na nararanasan ng mga Thai araw-araw—hindi lang iyong pang-turista. Kaya sa pagkakataong ito, kung titingnan ninyo ang mga music video at lahat ng konsepto, ibinabalik ko ito sa late ’80s o early ’90s ng Thailand. Hindi ako pumupunta sa mga sikat na spot kundi sa mga lokal na lugar, para makita n’yo ang Thailand sa mata ng mga Thai.

Ang bagong album Homecoming ay may mga produksiyong kasama si Pharrell. Nag-perform ka pa nga kasama niya sa konsiyerto sa Vatican City. Kumusta ang pakikipagtrabaho kay Pharrell?

Isang karangalan iyon. Napakaespesyal, at gustung-gusto ko ang proseso dahil ang tagal na niya sa industriya at isa siyang buhay na alamat. Maaaring “nobody” lang ako sa kanya, pero itinuring niya ako na parang nakababatang kapatid. Marami siyang naituro sa akin at napakaraming mabubuting payo ang ibinigay.

Ano ang ilan sa mga pangunahing pirasong isasalang mo sa auction at ano ang kahulugan ng mga ito para sa iyo?

Ang itim-at-pulang fur jacket ang paborito ko. Kakagawa ko lang nito, at ito ang kumakatawan sa akin ngayon.

Bilang artist na kumakatawan sa K-pop at sa Thailand, ano ang kahulugan para sa iyo ng pag-uugnay sa dalawang kulturang iyon para sa iyong mga tagahanga sa buong mundo?

Una sa lahat, gusto kong magpasalamat sa lahat ng taong nagpapahintulot sa akin na gawin ito. Sa tingin ko, maraming pagkakapareho ang Korea at Thailand. Pakiramdam ko, pareho kong hometown ang dalawang lugar—kalahati ng buhay ko sa Thailand at kalahati sa Korea. Isang malaking karangalan na nagagawa ko ito.

Nakapagtatag ka ng reputasyon bilang isang innovator, kapwa sa musika mo at sa iyong mga proyekto. Ano-ano pa ang mga layuning nais mo pang makamit, at ano ang inaasahan mong maging pamana mo?

Marami pa. Gusto kong sumubok sa pag-arte, pero hindi ko pa ito tinutuluyan dahil nag-aalala akong baka pumalpak ako sa isang pelikula. Gusto ko ring makalakad sa runway minsan sa buhay ko dahil gusto ko lang makita ang proseso. At dahil nakansela ang US tour ko dahil sa mga hindi inaasahang pangyayari, ngayon bilang solo artist, gusto kong makabisita sa U.S.

Ang BamBam: From the Stage and Beyond auction magtatapos sa Oktubre 27.