Opisyal: Bilyonarya na si Beyoncé

Buod

• Opisyal nang pumasok si Beyoncé sa hanay ng mga bilyonarya matapos kumita ng $148 milyon USD noong 2025, na naglagay sa kanya bilang ikatlong pinakamataas ang kinita na musikero ng taon at ikalimang musikero sa kasaysayan na nakapasok sa listahan ng mga bilyonaryong entertainer.
• Nakasalalay ang kanyang yaman sa pagmamay-ari niya ng sarili niyang music catalog, malalaking sponsorship at high-revenue na mga negosyo gaya ng Parkwood Entertainment, ang kanyang hair care brand na Cécred, at ang whiskey label na SirDavis.
• Ang Cowboy Carter tour ay nagbigay nang napakalaking tulak sa paglobo ng kanyang yaman, na kumita ng mahigit $450 milyon USD mula sa pinagsamang benta ng ticket at merchandise, bukod pa sa $50 milyon USD na bayad para sa kanyang Christmas Day NFL halftime show sa Netflix.

Opisyal nang bilyonarya si Beyoncé. Forbes ang nagkumpirma na kumita ang artist at negosyante ng $148 milyon USD noong 2025 (bago buwis) mula sa kanyang music catalog at mga sponsorship, na naglagay sa kanya bilang ikatlong pinakamataas ang kinikita na musikero sa mundo. Kabilang na siya ngayon sa listahan ng 22 bilyonaryong entertainer, at ikalima lamang na musikero sa grupo, kasama ang asawang si JAY-Z, Rihanna at iba pa.

Karamihan sa yaman ng 44-anyos ay mula sa kanyang musika, dahil hawak ni Bey ang mga karapatan sa kanyang catalog at kumikita nang malaki mula sa mga tour. Kabilang sa iba pa niyang negosyo ang sarili niyang business empire na Parkwood Entertainment, ang hair care brand na Cécred, ang whiskey label na SirDavis at ang ngayo’y hindi na ipinagpapatuloy na clothing line na Ivy Park.

Sa kabila ng laki ng gastos sa pagbuo ng isang dambuhalang engagement tulad ng Cowboy Carter tour, napatunayan na matagumpay ang mini-residency model ni Queen B na tumakbo lang sa siyam na stadium sa kabuuang 32 petsa. Kumita ang tour ng mahigit $400 milyon USD sa ticket sales at $50 milyon USD sa merchandise sales. Dahil ang sarili niyang Parkwood Entertainment ang nag-produce ng tour, mas malaki pa ang napanatili niyang kita.

Bukod pa rito, kumita rin si Beyoncé ng humigit-kumulang $50 milyon USD mula sa kanyang espesyal na Christmas Day NFL halftime show para sa Netflix, habang ang mga Levi’s commercial niya ay nagdala ng tinatayang $10 milyon USD.

Sa paglipas ng mga taon, tuluy-tuloy ang pagselyo ni Bey ng mga kasunduang malaki ang balik para lalo pang iangat ang kanyang yaman. Halos kalahati ng kita ng RENAISSANCE world tour concert film na umabot sa $44 milyon USD ang napunta sa kanya, at tumanggap din siya ng humigit-kumulang $60 milyon USD para sa kanyang Beychella documentary sa Netflix.