Jeff Bezos, magiging Co-CEO ng bago niyang AI start-up na Project Prometheus
Tutuon ito sa pag-develop ng cutting-edge AI para sa engineering, paggawa ng computer, pati na sa spacecraft at mga sasakyan.
Buod
-
Inilunsad ni Jeff Bezos ang AI startup na Project Prometheus, kung saan siya ang gaganap bilang Co-CEO kasama si Vik Bajaj, na suportado ng $6.2 bilyong USD na pondo.
-
Magtutuon ang kumpanya sa pagde-develop ng susunod na henerasyon ng foundational AI models para sa generalized intelligence, na direktang makikipagkumpetensya sa mga karibal tulad ng OpenAI at DeepMind.
-
Sa kasalukuyan, halos mayroon nang empleyado ang Project Prometheus at plano nitong ilapat ang AI nito sa mga industriyang kinabibilangan ng paggawa ng spacecraft, sasakyan, at computer.
Nakakuha ng isang bagong mabigat na kakompetensya ang global artificial intelligence landscape. Kumpirmado na ng bilyonaryong founder na si Jeff Bezos ang pagtatatag ng kanyang makabagong AI startup na Project Prometheus, at sa isang malaking hakbang, siya mismo ang uupo bilang Co-CEO. Ito ang unang executive operational role ni Bezos sa isang malaking negosyo mula nang bumaba siya bilang CEO ng Amazon—isang malinaw na senyales na determinado siyang yugyugin ang napakakumpetitibong AI sector.
Hango sa nilalang sa mitolohiya na kilala sa pagbibigay ng apoy at kaalaman sa sangkatauhan, nakatuon umano ang Project Prometheus sa pagbuo ng susunod na henerasyon ng foundational AI models na dinisenyo para sa generalized intelligence. Ayon sa mga industry analyst, direktang makikipagtagisan ang kumpanya sa mga nauna nang higante tulad ng OpenAI at Google DeepMind, gamit ang malawak na resources at matibay na engineering philosophy ni Bezos.
Ibabahagi ni Bezos ang Co-CEO title sa Project Prometheus kay Vik Bajaj, isang chemist at physicist na malapit na nakatrabaho ang co-founder ng Google na si Sergey Brin sa Google X. Lalarga agad ang proyekto na may dalang $6.2 bilyong USD na pondo. Kahit mananatili siyang malalim ang pagkakaugnay sa Blue Origin, sinasabing magkakaroon ang Project Prometheus ng AI development arm na nakatutok sa spacecraft, pati na rin sa paggawa ng sasakyan at computer.
Inaasahang agad na babaguhin ng paglulunsad ng Project Prometheus ang dynamics ng industriya, na maghahatid ng matinding scrutiny at mas maigting na kompetisyon habang naghahanda ang kumpanya na ilahad ang kanilang unang research goals sa unang bahagi ng susunod na taon. Dumarating ito isang taon matapos mamuhunan si Bezos sa Physical Intelligence, isa pang startup na nakatutok sa paglalapat ng AI sa mga robot. Sa kasalukuyan, halos may 100 empleyado na ang Project Prometheus, at agresibo nitong inaagaw ang top talent mula sa mga kakompetensya tulad ng OpenAI, DeepMind at Meta.
